Lam Alex's Podcast ( HK Aquaculture 本土養殖 )

Lam Alex 處女登場Podcast
介紹「本土養殖」理念、食用油分類及選擇

今次有幸以Food Innovation Trade Show 展覽形式,首次踏足加拿大多倫多
真係無諗過,黎到多倫多 除咗有一班親戚、朋友支持我之外,最意想不到嘅係 喺多倫多認識咗一班同路人。確實喺海外遇到香港人格外有一份親切感,「他鄉遇故知」正正可以形容我而家嘅感覺。
講返呢個Podcast點解得 10分鐘咁短,其實係無心插柳下,幾位加國朋友不約而同咁介紹咗呢度嘅電台節目主持人碧咸 Joseph我認識(大家唔好誤會,並唔係踢波嗰個碧咸呀~),咁就神推鬼㧬下造就咗今次訪問 感恩!!
今次可以透過頻道AM1540 「A1中文電台」嘅節目「A1 早晨」同兩位主持人暉哥、碧咸傾談,介紹「本土養殖」俾各位加拿大嘅朋友,實在喺我嘅榮幸。
希望「本土養殖」嘅「本魚」好快可以游到加拿大,游到大家手中。
感謝你哋嘅支持。

Supplement 係大家常常會接觸、最常用來補充營養不足的補充劑。但其實Supplement喺我地身體入面究竟吸收有幾多?
今集我想透過Podcast 同大家分享「我地身體營養吸收系統」,希望大家鍾意啦 🥰😊

早前帶出咗一啲健康問題,亦都極力提議大家去聽朋友嘅頻道去了解多啲「有科學背景支持嘅新健康數據同埋理念」,大家真係需要理性去面對,因為成件事對自己、對自己關心嘅人同樣重要,而且成個「新健康理念」相比起「現今嘅醫藥費用」,實在係花費無幾,總好過到你真係發病嘅時候

• 第一 要受住疾病嘅痛苦、煎熬 😣😮‍💨
• 第二 要受住西藥嘅藥效同後遺折磨 🤢🤮😵‍💫
• 第三 每逢有大病自身嘅壓力、自信心、情緒全部都非常困擾,亦都嚴重困擾埋家人同朋友(我個人都係好怕心理上嘅壓力、情緒係好難抒發、亂諗嘢好難控制、想法鑽牛角尖好難調整....🤦🏽‍♂️😢)
• 第四 大半生辛勞工作儲返嚟嘅積蓄全部俾晒去醫療方面,如果負擔唔起嘅,就更加痛苦,又要再求政府嘅恩恤,等大量嘅查察、等大量嘅手續.... (我個人意向,寧願尊嚴咁死,都唔寧願要求要憐憫)。

我成日都覺得香港人真係好辛苦(同時亦覺得我哋好勁😅).... 辛苦大半世,工作時間特長,做到天昏地暗,冇日冇夜,又唔放假,供車供樓,供仔女,好多人到最後退咗休都要節衣縮食.... 其實好肉赤呢,啲人好肉赤呢啲諗法.... (借位呻吓、宣洩一吓,放咗負 🙏🏼😅🙇🏽‍♂️Sorry Sorry)。

我自己本身做食材嘅,相信我係香港其中一個最有資格講Farm To Table嘅人,我一直帶出好多呢啲「食物安全」「食物添加劑」等等嘅問題,大大話話類似嘅問題喺我腦入邊已經超過10年,一直都不停研究解決方法,其實某程度上個疫情令到我構思咗好多解決方法出嚟,都係嗰句,我唔係啲咩叻人、冇認真讀過書、冇受過咩高等教育,一切只係憑良心將最原始、最基本嘅事同物用累積嘅經驗同僅有嘅智慧推理出嚟嘅理念為最基本而製造出一系列嘅產品.... 亦都正如我一直長氣提住:「所有嘢都有安排,所有事都係最好嘅安排,自己用心做好眼前嘅功課就夠。」💪🏽💪🏽💪🏽💪🏽😉☺️😘

喺腦入邊嘅概念,由思考、計算、設計、試造、試食、試效果.... 已經運行咗好幾年,終於等到開關,趁冬天真係確確實實走咗去印度搜羅最傳統、最天然嘅材料,進一步強化我想法嘅實踐能力,加上之前一直喺本地搜羅到嘅食材,我嘅健康系列終於成形,終於可以有實際啲嘅解決嘅方案可以提議俾大家.... 一直有留意開我分享嘅朋友都會約略知道我處事方式,一直都好怕遇到啲人亂提出議見,帶咗啲問題同埋困難出嚟,之後「冇解決方案」同埋「冇解決方向」之下冇責任地行開.... 咩呀~ 扮智者呀?堅唔喜歡同依啲阻住地球轉嘅Old Seafood合作.... 😅 當然自己都會不時檢討,自己會唔會冇為意之下犯類似嘅錯,之前出Podcast都有擔心呢個問題,其實想出得緊湊啲,唔好引起大家擔心,同講到好似好絕望咁樣,但係工作量實在太大,真係做唔切 😵‍💫😮‍💨 自己又唔熟錄Podcast工具上嘅運作,而且今年確實飛得太頻密,外出工作成日擔心飛之前做漏嘢,帶漏嘢,又一直擔心養殖場同事日常工作上大意失誤.... 😮‍💨😅 又借位呻吓,壓力係自己比自己嘅,一位尊敬嘅前輩有道:「行無愧怍心常坦,身處艱難氣若虹」。

我獨力成立「本土養殖」後,依六年嘅出品係喺我能力範圍以內可以做到最好嘅,我已經造咗出嚟俾大家,無愧 🙏🏼☺️🙇🏽‍♂️ 多謝大家!!

喺波士頓放假一日,行行下Public Garden,
隨心同大家分享波士頓展覽完感覺 同 印度人種植智慧